Job 36

1 U-Elihu waqhubeka wathi:

2 “Ake lingibekezelele okwesikhatshana ukuze ngilitshengise ukuthi kunengi okumele kutshiwo ngobuhle bukaNkulunkulu.

3 Ngiluzuza kude ulwazi lwami; ngithi ukwahlulela kuhle ngokukaMenzi wami.

4 Yiba leqiniso ukuthi amazwi ami aqinisile; yena opheleleyo elwazini ulawe.

5 “UNkulunkulu ulamandla, kodwa keyisi muntu; ulamandla njalo katshedi ezimisweni zakhe.

6 ababi kabayekeli bephila kodwa abahluphekayo uyabapha izimfanelo zabo.

7 Kawasusi amehlo akhe kwabalungileyo; ubakhweza esihlalweni kanye lamakhosi abaphakamise nini lanini.

8 Kodwa nxa abantu bebotshiwe ngamaketane, bethiwe nko ngezibopho zezinhlupheko,

9 uyabatshela lokho abakwenzileyo – ukuthi benze isono ngobuqholo.

10 Ubenza balalele ukuqondiswa abayale ukuthi baphenduke ebubini babo.

11 Aluba belalela bamkhonze, zonke izimpilo zabo ezisaseleyo zizaphumelela, leminyaka yabo ibe ngeyokusuthiseka.

12 Kodwa uma bengalaleli, bazabhubha ngenkemba, bafe bengelalwazi.

13 “Abangelabunkulunkulu enhliziyweni bagodle ukusola; lokuba angaze ababophe kabaceli ukusizwa.

14 Bafa besesebatsha, bephakathi kweziphingi ezingamadoda ezihlala ezindaweni zokukhonzela.

15 Kodwa labo abahluphekayo uyabakhulula ekuhluphekeni kwabo; ukhuluma labo besenkathazweni yabo.

16 “Uyakuhuga ukuthi uphume emihlathini yosizi uye endaweni ebanzi ekhululekileyo engelazibopho, ebumnandini betafula yakho igcwele izidlo ezimnandi.

17 Kodwa manje usindwa yikwahlulelwa okulungele ababi; ukuthonisiswa lokwahlulelwa kuhle yikho osekukuduba.

18 Qaphela kungabikhona okulingayo ngenotho; ungavumeli ukuthengwa ngemali kukususe endleleni.

19 Kambe inotho yakho loba wonke umtshikatshika wakho kungakusekela yini ukuze ungangeni osizini na?

20 Ungalangazeleli ubusuku, ukuze uyohudula abantu ezindaweni zabo.

21 Qaphela ungangeni kokubi, okukhanya ingathi uyakuthanda kulokuhlupheka.

22 “UNkulunkulu uphakeme ngamandla akhe. Ngubani ongafundisa njengaye na?

23 Ngubani ommisele izindlela zakhe na, loba othe kuye, “Usuwenze okungalunganga’?

24 Khumbula ukukhulisa umsebenzi wakhe, abantu abawudumisileyo ngengoma.

25 Bonke abantu jikelele bakubonile lokhu; abantu bakukhangela bemi khatshana.

26 Mkhulu kakhulu uNkulunkulu kungaphezulu kokuzwisisa kwethu! Iminyaka yakhe ingazake yaziwe.

27 “Uyawadonsa amathonsi amanzi, aqulungane abe lizulu elingena ezifuleni;

28 amayezi athulula amanzi awo kune imikhizo emikhulu ebantwini.

29 Ngubani ongakuzwisisa ukuthi uwendlala njani amayezi na, ukuthi ukhwaza njani esesiqongweni sakhe na?

30 Ake libone ukuthi uwuhlakaza njani umbane wakhe azizingelezele ngawo, abhukutshe ezinzikini zolwandle.

31 Yiyo indlela abusa ngayo izizwe aziphe ukudla okunengi.

32 Ugcwalisa izandla zakhe ngombane awukhombise lapho omele utshaye khona.

33 Ukuduma kwakhe kubika isiphepho esizayo; lezinkomo ziyatshengisa ukuza kwaso.